Thursday, November 10, 2016

සැබෑ අවිහින්සාව



මනුශ්‍යයින් වන අපිට මේ  ලෝකය තාවකාලික නවාතැන් පලක්. වෙනත් විදියකින් කිව්වොත් යම් කිසි කාල සීමාවකට පැමිණි චාරිකාවක්. සියලු දේ වෙනස් වෙමින් පවතින ලෝකයක අපිත් මොහොතින් මොහොත වෙනස් වෙමින් ජීවිතය අවසාන මොහොත වෙනකල් ගමන් කරනවා. මේ ලෝකෙ කිසිම දෙයක් ස්ථිර හෝ සදාකාලික නැහැ.

ජීවිතේ කිසිම සැපක්වත්, කිසිම දුකක් වත් ස්ථිර නෑ. නිතරම වෙනස් වෙනවා. ඉතින් සැප ලැබෙද්දි ඒකෙ ඇලිලා වැඩකුත් නෑ, දුක ලැබෙද්දි ගැටිලා වැඩකුත් නෑ. ස්වභාවය නුවණින් අවබෝධ කරගෙන සතුටින්, පහන් සිත් ඇතුව ජීවත් වෙන්නයි අවශ්‍ය වෙන්නේ. 

අපි ජීවත් වෙන මේ කාල සීමාව තුල  අපි කොහොමද තමන්ටත් අනුන්ටත් කරදරයක් නොවී ජීවත් වෙන්නේ.  

මූලිකම දේ  තමයි තමන් සතුටින් ජීවත් වීම.  සතුටින් ජීවත් වීම ඇත්තෙන්ම ආශ්චර්යයක්. අපි හැමෝම නිතරම සිහිකරන්න ඕනෙ දෙයක් තමයි, අනික් අයත් තමන් වගේමයි කියන එක. මට දුකක් කරදරයක් දැනෙනවට මම අකැමති වගේම අනෙක් මනුස්සයොත් කැමති නෑ දුක් කරදර වලට. මම සතුට, සැපතට කැමති වගේම අනික් අයත් ඒවට කැමතියි. අනික් අයත් මම වගේම නිසා මම කාටවත් දුකක්, කරදරයක්, හිරිහැරයක් නොකරන කෙනෙක් වෙන්න ඕනෙ. ඒ වගේම අනික් අයට සතුට, පහන් සිත් ඇති කරන කෙනෙක් වෙන්න ඕනෙ. මේක තමයි සැබෑ අවිහින්සාව.

තමන් තමන්ට ආදරේ මිනිස්සු තමයි අනික් අයටත් ආදරේ. තමන්ටම කරුණාවන්ත මිනිස්සු අනික් අයටත් කරුණාවන්තයි. තමන් තමන්ව හොඳින් රැක බලා ගන්න අයට පුලුවන් තවත් අයව රැක බලා ගන්න. හැම දේම ආරම්භ වෙන්නේ තමන් තුලින්මයි. මම මට කරුණාවක් නැත්තම් මට බෑ තව කෙනෙක්ට සැබෑ කරුණාවක් දක්වන්න. මම ලඟ නැති දෙයක් මන් කොහොමද තව කෙනෙක්ට දෙන්නේ. ඒ නිසා ලෝකයේ අනික් මිනිස්සුන්ගේ අඩු පාඩු බලන්න කලින් අපි බලන්න ඕනෙ තමන් දිහා.

තමන් කරන කියන දේවල් දිහා බලාගෙන ජීවත් වෙද්දි ඇතිවෙන අවබෝධය වචනෙන් කියන්න බෑ. ඒක ඒ තරම් පුළුල්, යම් යම් දේවල් වල නියම ස්වරූපය දැකීම,  සැබෑ ලෙසින්ම අවබෝධ වීම තරම් ආශ්වාදජනක නෑ වෙන කිසිම දෙයක්.

මිනිස්සුන්ට විතරක් නෙවෙයි සත්තු, ගහ කොළ වලට පවා අපි කාරුණික විය යුතුයි. ඒ සියලු ජීවී, අජීවී දේවල් වලට දැනීමක් තියනවා. ඒ නිසා අපි තුල ඇතිවන අව්‍යාජ මයිත්‍රීය, කරුණාව කොයිතරම් අත්‍යාවශ්‍යද මේ විශ්වයට.

අපි සියලු දෙනාම අනික් අයත් මම වගේමයි කියලා අවබෝධ කරගෙන තමන්ටත් අනුන්ටත් කරදරයක් නොවී අවබෝධයෙන්  ජීවත් වෙද්දි , අපි ජීවත් වෙන පරිසරයේ ප්‍රශ්න අඩු වෙලා සාමකාමී , සුන්දර තැනක් වෙනවා. අපිටත් අනික් අයටත් ජීවත් වෙන්න සුදුසු තැනක් ඉබේම නිර්මාණය වෙනවා.


No comments:

Post a Comment


What do you think?

It’s your turn.

Please feel free to share your experiences, opinions, thoughts in the comments box below.