Thursday, November 17, 2016

ඇතිවීම - පැවතීම - නැතිවීම



අපි ඇත්තටම ජීවත් වෙනවා කියලා කරන්නෙ නොනවත්වා ක්‍රියාත්මක වෙන ක්‍රියාවලියකට හසුවෙලා ගමන් කරන එක(continuous process) .මේ ක්‍රියාවලිය තමයි- ඇතිවීම,පැවතීම, නැතිවීම කියන ස්වභාවය. හැමතැනකම තියෙන්නෙ මේ එකම ක්‍රියාදාමයමයි. මේකට පරිබාහිර කිසිම ක්‍රියාවලියක් මේ සොබාදහම තුල නැහැ.

අපි ඉපදෙනවා. ඊට පස්සෙ ආයුෂ ඉවර වෙනකල් මේ ලෝකය තුල පවතිනවා. පැවතිලා අන්තිමේදි මැරිලා/නැතිවෙලා යනවා.  නිවන් දකින කල්ම මේ විදියට ඉපදි ඉපදි මැරි මැරි අපි දිගටම කෙළවරක් නැතුව සන්සාරෙ ගමන් කරනවා.

අපි මේ ලෝකෙ පවතින/ජීවත් වන කාලෙ මොනාද ඇත්තටම දවස ගානෙම කරන්නෙ. අපි හැමදාම වගේ කනවා, බොනවා, නිදගන්නවා වගේ ක්‍රියාවන් කරනවා. මේකෙ කෙළවරක් දකින්න පුලුවන්ද? බෑ.
බඩගිනි දැනෙනවා - කෑවම බඩගින්න නිවෙනවා, තිබහ දැනෙනවා- බිව්වම තිබහ නැතිවෙනවා, නිදිමත දැනිලා නිදාගෙන නැගිට්ටම ආයෙත් ටික වෙලාවකින් නිදිමත එනවා. බඩගින්නක් හැදිලා කෑම කෑවම බඩ පිරුනට ආයෙ ටිකකින් බඩගිනි වෙනවා.  තිබහට වතුර බීලා, ආයෙ ටිකකින් තිබහ දැනෙනවා.ඔය විදියට අපි හැමදාම මැරෙනකල්ම මේවා කරනවා. නුවණ මෙහෙවලා බැලුවහම පේනවා මොකක්ද මෙතන ඇත්තටම සිද්ද වෙන්නෙ. මේ හැම ක්‍රියාවකම තියෙන්නෙ එකම ස්වභාවයක්. ඇතිවීමක්, පැවතීමක් හා නැතිවීමක්.

අපි හැමෝම ඇතිවීම, පැවතීම, නැතිවීම කියන චක්‍රයට හසුවෙලා තමයි ජීවත් වෙන්නෙ. ඇත්තටම ස්වභාව ධර්මය පවතින නියම ආකාරය තමයි ඒක.

මේ ස්වභාව ධර්මය පවතින නියම ස්වභාවය දැක්කම තමයි අපිට ධර්මය අවබෝධ වෙන්නෙ. ඒ කියන්නෙ අපේ පැවැත්ම අපිට අවබෝධ වෙනවා. පැවැත්ම අවබෝධ වෙච්ච මනුස්සයෙක්ට තමයි ඉන් එහාට ගිය දෙයක් දකින්න පුලුවන්. ඒ කියන්නෙ පැවැත්ම වගේම නොපැවැත්මත් දකින්න පුලුවන්. මොකද මේ පැවැත්ම පවතින්නෙ නොපැවැත්ම තුල නිසා.

යම් කිසි කෙනෙක් පැවැත්ම සහ නොපැවැත්ම දෙකම නිවැරදිව දැකලා අවබෝධ කරගෙන, තමන්ගේ මද්‍යස්ථය තුල (මධ්‍යම ප්‍රතිපදාව ) ජීවත් වෙන්න පටන් ගත්තොත් යම් දිනයක එයාට පුලුවන් වෙනවා කිසිම ප්‍රශ්නයක් නැතුව , ජීවිතය පවතින කල් අවශ්‍ය විට පැවැත්ම තුලත්, අවශ්‍ය විට නොපැවැත්ම තුලත් ඉන්න.  ඒ වගේ කෙනෙකුට මේ දෙකම කිසි ප්‍රශ්නයක් නෑ. එහෙම කෙනෙක් කිසිම චක්‍රයට හසුවෙලා නැහැ, ඒ කියන්නෙ ඇතිවීම, පැවතීම, නැතිවීම කියන නැවත නැවත සිදුවෙන චක්‍රයෙන් එයා මිදුන කෙනෙක්.

No comments:

Post a Comment


What do you think?

It’s your turn.

Please feel free to share your experiences, opinions, thoughts in the comments box below.