Monday, February 13, 2017

සැබෑ ආදරය, කරුණාව, මයිත්‍රීය ඇති වෙන්නේ සත්‍යය අවබෝධය තුලින්මයි


මේ ලෝකෙ සැබෑ ආදරයක් , කරුණාවක් , මයිත්‍රීයක් කාගෙ හරි තුල සත්‍ය වශයෙන්ම ඇති වෙනවා නම් ඒ ඇත්තටම යම්කිසි ප්‍රමාණයකට හෝ සත්‍යය අවබෝධ කර ගත්තු කෙනෙක්  තුළ විතරමයි. 

බොහෝ අය ආදරෙයි කියලා තව කෙනෙක්ට කිව්වට ඒගොල්ලො ඇත්තටම ආදරේ තමන්ටම විතරයි. ඒක තමයි තිත්ත උනත් ඇත්තම කතාව. මිනිස්සු මේ ආකාර කියන මේ "ආදරය " කියන වචනයේ ඇත්තටම ආදරයක් තියෙනවද කියලා කල්පනා කරල බලන්න. මිනිස්සු ගොඩක් වෙලාවට හිතන්නෙ සහ බලන්නෙ මේ ආදරේ නිසා තමන්ට ලැබෙන ලාබ ප්‍රයෝජන , වාසි මොනවද කියන එක. මේක මේ ආදරවන්තයො විතරක් නෙවෙයි දෙමවුපියන්ගෙ , නෑදෑයොන්ගෙ ඉඳලා ඇත්තම කතාව ඕකයි. ඒගොල්ලො කියනවා ආදරෙයි කියලා, ඒත් ඇතුලතින් තියෙන්නෙ තමන් ගැනම ආදරයක් විතරයි. ඒ ආදරය තුල යටින් නූලක් තියනවා. බලාපොරොත්තු තියනවා. මිනිස්සු ගොඩක් වෙලාවට කියන්නෙ ඔයා මට අරක අරන් දුන්නොත් ඔන්න මන් ආදරෙයි කියලා. නැත්නම් මෙන්න මේ මේ දේවල් කලොත් ආදරේලු. මේ මොනතරම් බොරුවක්ද. තමන්ට ඒ ලැබෙන දේවල් නිසා ආදරෙයිලු. 

සැබෑම ආදරය තුල යටින් නූලක් නෑ. ඒකෙන් යම් යම් දේ බලාපොරොත්තු වෙන්නෙ නෑ. තමන්ට ලබා ගැනීමක් ගැන හිතන්නෙ නෑ. ඒ තුල තියෙන්නෙ දීමක් විතරමයි. අන්න ඒක නිසා තමයි ඇත්තම සත්‍යම ආදරයක් කරුණාවක් අපිට ලැබුණොත් ලැබෙන්නෙ සත්‍යය අවබෝධ කරපු කෙනෙක්ගෙන් විතරමයි. ඒගොල්ලො අපිට ඇත්තටම කරුණාවන්තයි, ආදරෙයි. කවදාවත් දීමක් මිස ලබා ගැනීමක් ගැන උවමනාවක් ඒ අය තුල නෑ. අන්න එහෙම කෙනෙක් තමන්ගෙ ජීවිත කාලෙ මුණ ගැහුනොත් අපිට දැනෙනවා සැබෑම ආදරය කරුණාව මොනතරම් දුරක් විහිදුනු මොනතරම් නිවුනු දෙයක්ද කියන එක. ඇත්තටම ඒක වචන වලින් කියන්න බැරි තරම් ශ්‍රේෂ්ඨයි.  ඇත්තටම ඒක අප්‍රමාණ වූත් අනන්ත වූත් ආදරේකට එහා ගියපු මයිත්‍රීයක්.

අපිට ජීවමාන බුදු වරයෙක් මුණ ගැහුනොත් ඇත්තටම උන් වහන්සේ තුල මොනතරම් කරුණාවක් , සැබෑ ආදරයක් තියෙයිද. ඒක අපිට අප්‍රමාණව දැනේවි. ඒ වගේම සත්‍යය යම් කිසි දුරකට හෝ අවබෝධ වෙච්ච කෙනෙක් තුලත් මේ සැබෑ කරුණාව යම් තරමක් පවතිනවා. මේ භෞතික ලෝකෙ ආදරෙයි , ආදරෙයි කියා ගත්තු කිසි මිනිහෙක් තුල ඒක නෑ. තමන් ආදරේ තමන්ට විතරයි. මේ ගොල්ලො බලන්නෙ තමන්ට ලැබෙන දේවල්, තමන්ගෙ ගොඩ වැඩි කරගන්න හැටි, එතකොට කොහොමද ගරු නම්බු නාම ලබන්නෙ ඕවා මේව විතරයි. ඒ උනාට කියන්නෙ ආදරෙයි , කරණාවයි කියලා. මේ ලෝකෙ මේ සජීවී ව තිරගත වෙන ඩ්‍රාමා එක බලන් ඉන්න එක හරිම විනෝද ජනකයි.මිනිස්සු කොයිතරම් මෝඩයිද සහ මොනතරම් බොරු ගොඩකද මේ ජීවත් වෙන්නෙ. කිව්වත් තේරෙන්නෙ නෑ. මොකද ඒ තරම් අපි මේ මායාවට නැත්තම් බොරුවට අහු වෙලා.

ඇත්තටම මම ඇතුලු අපි හැමෝම මේ ලෝකෙ ගැටීම් වලට වඩා හිරවෙන තැන තමයි බැඳීම්. අපි සමහර දේවල් කෙරේ මනසින් බැඳෙනවා. එතනයි ගැටලුව තියෙන්නෙ. මනසින් බැඳෙන් නැත්තම් අපි අවට ඉන්න දෙමවුපියො, නෑදෑයො, යාලුවො , එතකොට අනිකුත් සම්බන්ධතා මේ සියල්ල තිබුණා කියලා ප්‍රශන්යක් නෑ. මොකද මේ කිසිම බැඳීමක් අපි ඔසවාගෙන ජීවත් වෙන්නෙ නෑ. ඒත් මනසින් බැඳුනොත් එතන ඉඳන් අපි භෞතිකව ඔසවා නොගත්තට බැඳීම මානසිකව ඔසවාගෙන ගමන් කරනවා. එතනදි ගැළවීම ටිකක් අපහසු වෙනවා. ඔය මොන මානසික බැඳීමක් ගත්තත් යතාර්ථය නම් , ඇත්තම ඇත්ත නම් ඒවා තුල නිවනක් නම් නෑ.

සැබෑම ආදරයක් ඇති කෙනෙක් අපිට හම්බුණොත් එයා අපිට සත්‍යය කියලා දෙනවා. යතාර්ථය පෙන්වලා දෙනවා කිසිම යටි බලාපොරොත්තුවකින්, තමන්ට ලැබෙන දෙයක් ගැන අදහසකින් තොරව. අන්න ඒ වගේ උතුමන් හැර මේ ලෝකෙ කවුරු ආදරෙයි ,කරුණාවයි කිව්වත් ඒ ආදරය, කරුණාව කියන වචන තුල ඇත්තටම ඒක නෑ. 

අපිට පුලුවන් සැබෑම ආදරක් , කරුණාවක් , දයාවක්, මයිත්‍රීයක් ඇති කරගන්න. අපි බලාපොරොත්තුවකින් තොරව දෙන්න පුරුදු වෙන්න ඕනෙ.  මිනිස්සු අඩුම තරමෙ පින් හරි බලාපොරොත්තු වෙනවමයි මොන මොනවා හරි කරලා. එතනයි ගැටලුව.  මිනිස්සුන්ට කරුණාවෙන් කතා කරන්න, තියන දේවල් බෙද හදා ගන්න, එතකොට උදව්වක් කරන්න, අඩුම තරමෙ අවන්කව හිනාවෙන්න වත් පුලුවන් නම් ඒක සැබෑ මයිත්‍රී සහගත දීමක් වෙනවා.

සැබෑ ආදරය, කරුණාව, මයිත්‍රීය ඇති වෙන්නේ සත්‍යය අවබෝධය තුලින්මයි.

No comments:

Post a Comment


What do you think?

It’s your turn.

Please feel free to share your experiences, opinions, thoughts in the comments box below.